Qyteti është i njohur për lagjet e tij tipike, të përbërë nga shtëpi të ulëta dhe vila, të cilat janë të shtruara me kalldrëm. Qyteti i Korçës ka një sërë muzesh si Muzeu i Edukimit (i vendosur në ndërtesën ku u hap shkolla e parë shqipe në 1887), Muzeu Kombëtar i Artit Mesjetar i rinovuar (për tu vizituar absolutisht), Muzeu Prehistorik, Shtëpia-Muze e piktorit të njohur Vangjush Mio, Muzeu i Artit Oriental “Bratko”, Muzeu i Fotografisë Gjon Mili etj. Në afërsi të qytetit ndodhen varrezat e ushtarëve francezë të rënë gjatë Luftës së Parë Botërore.

Teatri Cajupi është gjithashtu një vend për të parë koncerte ose shfaqje teatrore në varësi të sezonit.

Përpos muzeve dhe monumenteve, Korça është qyteti ku organizohen karnavalen më të mëdha në Shqipëri, aktivitet i cili është përpara Pashkëve Ortodokse. Qyteti është i njohur për këngët lokale, të quajtura  serenata . Në qytet do të gjeni shumë taverna me gatime tradicionale me shije të tilla si lloje të ndryshme të byrekëve të cilat kombinohen në mënyrë perfekte me muzikën e mirë dhe pijen tradicionale, rakinë.

Korça është një bazë shumë e mirë për të eksploruar shumë pika turistike të vendosura në malet aty pranë si Voskopoja, Dardha, Vithkuqi dhe Boboshtica. Këto fshatra janë të njohura për ofrimin e mundësisë për të praktikuar shumë sporte dhe aktivitete në natyrë. Zona është e famshme gjithashtu për kishat bizantine të Vithkuqit dhe Voskpojës, muret e të cilave janë pikturuar nga piktorë të famshëm mesjetarë shqiptarë. Në afërsi të Korçës mund të vizitoni Liqenin e Prespës (i cili është Parku Kombëtar më i madh i vendit), Parkun Kombëtar të Drenovës, tumën ilire të Kamenicës, etj.