Qyteti i Tropojës [Bajram Curri] ose “Malësia e Gjakovës”

Ka një sipërfaqe të përgjithshme prej 1143km², lartësi mesatare 1105m mbi nivelin e detit, ndërsa qyteti i Bajram Currit 330-360m mbi nivelin e detit. Popullsia është mbi 28000 banorë, ndërsa qyteti i Bajram Currit ka 8230 banorë. Tropoja shtrihet në juglindje të alpeve të Veriut.

Nga ana administrative Tropoja kufizohet në lindje me Republikën e Kosovës, në veri me Malin e Zi, në jug me rrethin e Hasit, në jug perendim me rrethin e Pukës dhe në perëndim dhe veriperëndim me trevën e Dukagjinit.

Në Malësinë e Gjakovës bashkjetojnë natyrshëm mrekullitë mbitoksore dhe nëntoksore që natyra i ka dhuruar kësaj treve, çka edhe e bën atë të përshtatshme për turizëm natyror e kulturor në dimër e në verë si dhe të lakmueshëm për investitorët vendas dhe të huaj.

Të dhënat historike, arkeologjike, etnografike e të tjera, janë një dëshmi e gjallë dhe na bejnë të besojmë se kjo trevë ka trashëguar një kulturë të hershme materiale dhe shpirtërore shumë të moçme, dhe ndonëse një krahinë relativisht e vogël, ka qenë jo vetëm vatër e trashëgimisë së kulturës Iliro-Dardane, por edhe vatër e trimërise dhe luftrave të shquara në mbrojtje të trojeve të veta.

Administrata e parë në Malësinë e Gjakovës do të vendosen në vitin 1916 me Nënprefekturë në fshatin Bujan, dhe me katër krahina: Bytyç, Tropojë, Bujan e Nikaj-Mertur. Në vitin 1925 deri në 1952 qendra administrative e kësaj treve do të ishte Tropoja, ndërkaq në vitin 1952 qendra u zhvendos në fshatin Kolgecaj, tani qyteti i Bajram Currit.